الجزء اﻻول - مشاكل وحلول الشبكات بمشاركة اﻻعضاء علي مواقع التواصل









    الجزء اﻻول - مشاكل وحلول الشبكات بمشاركة اﻻعضاء علي مواقع التواصل


    السلام عليكم ورحمة الله 
    اعضاء وزوار موقع وي كايرو  في مصر  والوطن العربي كله 
    زي ما احنا متعودين ان كل مواضيع الموقع حصرية ومش منقوله من اي موقع تاني واحنا اللي بنتكتبها ليكم  حبينا انهارده  نحاول نساعد علي قد ما نقدر ان الموضوع ده يبقي مرجع  لاي حد يقع في اي مشكله  وهنرقم المشكلة  علشان لو حبيت تبعت لحد حل اي مشكله تقوله علي رقم مشكلته علطول بدل ما يفضل يدور  وان شاء الله نستمر في هذه السلسله المقدمه من موقع وي كايرو   ب اسم الله نبتدي توكلنا علي الله 

    س1:- السلام عليكم كل سنة وانتم طيبين رمضان كريم
    عندي استفسار بعد اذنكم
    انا فاتح محل صيانة اجهزة كمبيوتر وبيع وشراء فكنت موصل واي فاي للناس ولكن لم لقيت الباقة بتخلص بسرعة روحت قولت اجيب جهاز ميكروتيك واعمل كروت للمتشركين بسرعات مختلفة روحت جبت كمان نانو ستيشن ام 2 ركبته ووصلت والدنيا حلوة بعد كام يوم اتصدمت لقيت النانو ستيشن بيجيب الى قودامه بس ومسافة 200 متر او 300 متر فقط وبيجيب حوالي 60 درجة يعني مش بيوزع واي فاي زي منا كنت متخيل بيقولو بيوزع كيلو او كيلو ونص طلع الكلام دة كدب دة بيوصل 200 او 300 متر فقط ومش بيجيب 360 درجة
    المهم استفساري عن ايه انضف جهاز اركبه يغزي المنطقة كلها مع االعلم ان المنطقة كلها علي بعضيها لو حسبناها بالكيلو فهية تدخلها في 2 كيلو من اولها لاخرها فكنت عايز اشتري جهاز اوزعلها واي في لان النانو ستيشن مكلف فعايز اشتري جهاز افضل يوزعلي 360 درجة مره واحدة بدل لم اجيب اكثر من جهاز
    والاستفسار الثاني عن عندي روتر ميكروتيك 951 كنت عايز اعرف بيشيل كام واحد اونلاين من المشتركين


    ج1:- إجابة اﻻخوة كانت كا التالي 

    1-يا باشا ادمج علي كيسه وريح دماعك ولو موصل في الشارع عندك والشارع اللي وراك هات روترات هواوي 531 وحولها اكسيس وانسي الدنيا وروق علي حالك وﻻ راوتر بورد وﻻ قرف اقسم با الله الكيسه هتبقي تمام وﻻ تهنيج وﻻ قفله وﻻ اي قرف من ده كله

    2- ريح دماغك واشتغل باكسسات ال جى 5000 او 6000 واعمل ربيتر خاصيه ارسال واستقبال

    3-
    مين قالك ان النانو بيجيب 360 درجه النانو اصلا اخره 60 درجه و بينقل لحد 2ل 5 كيلو ع التردد 2.3 و لازم يكون بدون عوائق انت محتاج حاجه توزع دائري يبقي بيكو او بوليت ده اللي اعرفه

    إدارة
    4-جبتها منين انه بيبث 360 درجه ممكن تشوفه لو مسافه عبيطه جدا انما مستحيل يبث 360 درجه حتي الشركه المصنعه مقالتش الكلام اللي انت بتقوله




    س2:- الآكسس ده عملى برجله كل ماشغله عندى الشبكة توقف عملتله رست نفس الموضوع ايه الحل





    ج2:- إجابة اﻻخوة كانت كا التالي 

    1-اوسخ وازبل اكسس فى العالم يعوض ربنا عليك ههههههههههه
    2-هو مشكلته انه بيرزت لواحدة بيرجع ضبط مصنع لو فصلته من الكهرباء و صلته تاني
    3-هههههههه ارميه ف الزبالة بدل ماتخسر عقلقك وتخسر عملائك
    4-ده زبالة بص اعمله تحديث سوفت وير هيظبط معاك بس متشتريش منه تاني لانه اكسيز ابن مرة
    5-اوسخ نوع نزل السوق خساره فيه عود الكبريت
    6-اوسخ أجهزة بجداره غلطة عمرى
    7-حله الوحيد شويه بنزين وتولع فيه



    س3:-عندي خط ارضي نحاس في محافظة سوهاج محتاج اوصل عليه خط انترنت مفتوح ممكن حد يفيدني ايه الشركات ممكن اتعاقد معاها علي خط مفتوح



    ج3:- إجابة اﻻخوة كانت كا التالي

    1- مفيش نحاس كله فايبر الوقتى
    2-  90% من خطوط مصر نحاس




    س4:- بعد اذنكم يا رجاله ، انا عندي dvr ahd عايز اعرف برنامج ايه اللي يشتغل عليه علي الموبايل

    ج4:- إجابة اﻻخوة كانت كا التالي

    1-نزل برنامج qr reader امسح الكود على شاشه ال dvr من خلال اختيار كلمه توجيه او guide من على القائمه الرئيسيه لل dvr وووجه كاميرا الموبايل على اختيار اندرويد لو الموبايل نظام اندرويد ولو ايفون اختيار ios او iphone هينزلك البرنامج على طول


    س5:- السلام عليكم كل عام وانتم بخير رمضان كريم لو سمحت عندي شبكة وفي ناس عايزة تربط علي الشبكة بتعتي بجهاز TpLink wr840n فلو سمحت عايز اعرف ازاى اربطه علي شبكة عشان يلقط علي شبكتي

    ج5:- إجابة اﻻخوة كانت كا التالي

    1-الاكسس دا فيه سوفت راوتر يعنى لو ما قفلتش الDHCP هيرمى ايبهات ع الشبكة ويعملك مشاكل وهتحتاج تعمل حاجة اسمها wdc بريدج وياريت متربطش بيه احسن خليهم يشغلوه تحت يوزعلهم واى فاى وفوق يجيبو اكسس tp link 701 واعملو كيلنت او اكسسLG بسوفت النانو واعملو استيشن

    2-اكسس جيار على فكره حلو جدا بس هو مشكله مفهوش CLINT



    س6:- مفيش حل للمشكله دي الابلود عالي جدا زي الي في الصوره ومفيش نت خارج للعملاء




    ج6:- إجابة اﻻخوة كانت كا التالي


    1-ده روتر وانت عاملة اكسس او روتر توتو لينك ومن الاخر عشان توصل لو ارضي هتفصل سلك سلك وانت متابع ع السيرفر


    2-عندك لوب على ما اعتقد


    3-مشكلة الابلود بكون فيه ارجيات مكلسات او مصديات او عليهم مية ورطوبة
    افصل خط خط لحد ما تعرف من وين المشكلة

    س7:- هل ينفع اشغل اكسس lg فى منطقة مفهاش نت وانزل منة بسلك على سوتش قى الشارع اشغل علية 20 عميل بس ارجو إلى يرد يكون مجرب عنة


    ج7:- إجابة اﻻخوة كانت كا التالي

    1-نفع انا عامل كده بس هوائى مش سلك

    2-ينفع بش خلي اشارته عاليه علي قد ما تقدر

    3-جرب احسن تردد و اختار الافضل  2.3 or 2.5



    س8:-عندي مشكلة لسة حاصلة دلوقتي حالا كل الناس بتيجي تخش بالكروت بتعتها يقولها هذا الكرت مستخدم في جهاز اخر مع العلم اني لم بصيت في الهوت سبوت ملقتش الكرت معمله اكتف في تسجيل الدخول 
    وجربت قولت يمكن الميكروتيك 951 مهنج ولا حاجة روحت مرستره ونفس القصة هذا الكرت مستخدم في جهاز اخر 
    ارجوا حل المشكلة دي يا جماعة والنبي حالي واقف والناس هتجنني

    ج8:-إجابة اﻻخوة كانت كا التالي

    1-امسح سجل النظام الي في اليوزر منجر


    س9:- لو سمحت يا جماعة انا جبت الروتر الجديد ابو ٦٠٠ جنيه دة عشان ال vdsl واشتركت فى السرعات الجديدة ولسة الروتر قارى Adsl 2 plus ازاى اخليه يقرى vdsl ؟؟

    ج9:-إجابة اﻻخوة كانت كا التالي

    1-لازم يكون الخط الفايبر واصل للروتر

    2-اتصل بالمبيعات وقولهم عايز اخلي البورت بتاعي يدعم ال 
    vdsl 
    هيقدمولك طلب وهيتحول خلال ٧ ايام

    3- حضرتك نحاس وله فيبر لو نحاس هيفضل كده لو فيبر يبقا في مشكله ف خط حضرتك

    4-والله العظيم الموظف بتاع تى داتا قالهالى قالى ليه عايز تشتري الروتر قولته علشان ازود السرعه قالى ف مصر اخرها 8 ايا كان نوع الروتر


    س10:- عندى استفسار يا شباب الشركة جابت كابينة فايبر عندنا فى المنطقة علشان فى كابلين مقطوعين فى الكابينة النحاس القديمة بس لسة الفايبر مشتغلتش فعاوز اعرف السلك الفايبر ده هيكون من السنترال لحد الكابينة بس ولا بيوصل لحد البيت ؟ والسؤال التانى بياخدوا وقت قد ايه على ما تشتغل الكابينة الفايبر دى؟ وفى اى تجهيزات انا اعملها من عندى كوصلات او اى حاجة لما الكابينة تشتغل؟

    ج10:-إجابة اﻻخوة كانت كا التالي

    1-اولا الفايبر بيكون لحد الكابينه وثانيا الوقت حضرتك على حسب المنطقه وعدد المشتركين وسعه الكابينه ومش مطلوب منك اى وصلات أو اى حاجه وربنا يصلح الحال

    2-حصلت عندنا الكابل الرئيسى اللى جاي من السنترال نحاس واتسرق مرتين فجابو كابينة فايبر وغيرو الكابل من السنترال لغاية الكابينة وخلوها كابلات فايبر ... اما الكبلات اللى طالعة من الكابينة للبيوت بتفضل زى مهى مش بتتغير

    3-انا سمعت ان الشركة بتغير الكابينة بس لفايبر لكن الوصلات اللى ما بين السنترال والكابينة بتفضل نحاس زى ما هى القديمة ـ يعنى ضحك على الدقون ونصب على الناس وخلاص

    4-لو الرقم بتاعك اتغير واشتغل حراره قدم عليه من اول هيوصلك النت اسرع لا لو استينت ينقلك الخدمه من الرقم القديم للرقم الجديد هتدخل ف ٢٠ يوم انا عملت كده لما حولوا الكابينه عندي فايبر


    س11:- سؤال بسيط لأهل الخبرة ده الروتر اللى عندى وسرعتى ميجا بلس واصلة لحد 16 ميجا وبحمل بأصى سرعة ... هل التحميل بسرعة 16 ميجا متصل لوقت معين يأثر على الروتر أو إن الروتر بيكون ليه سرعة معينة أو طاقة ,,,, ممكن إفادة لأن الأنظمة الجديدة كلها بقت سرعات عالية ,,, وبالمناسبة فى 4 روترات من نفس النوع مدموجين بريدج على روتر بورد 750 جى ال .. هل الروتر بورد يشيل تحميل سرعة 64 مع التحميل بأقصى سرعة ,,,,,




    ج11:-إجابة اﻻخوة كانت كا التالي

    1-الروتر دا كويس جدااا انا شغال بيه ومش بيهنج الحمد لله

    2-الروتر ده صناعة تايواني شغال بردج تمام تمام لحد سرعات 16 ميجا بدون اي مشاكل ... متاح كمية للي محتاج

    3- السرعات العليه ليها نظام اسمو VDSL بيكون راوتر غير االلي عندك دا ال adsl أخرو 16 ميجا اكتر من كدا هتعوز حاجه تانيه اما بالنسبه لموضوع الروترات بتشيل ايه و الافضل البريدج بيريح الراوتر فقط و مفيش اي اختلاف في النت ، العادي هو هو بي بيشغل الاراوتر الاستخدام الطبيعي بتاعو ، اما بالنسبه لموضوع بور الراوتر دا بيكون في كل الاحوال ثابت و مش بياثر غير لما الادابتر يبوظ ، لو التحميل بيقل في وقت و وقت دا بيكون نظام من الشركه ، او بيكون مشكله في الخط الارضي ، في رأيي متغيرش ميجا بلس في الوقت الحالي لحد ما العملاء العادين يجربو بعدها ندخل احنا كشبكات في الموضوع او لا علي حسب اللي هنشوفو.





    تحذير  مهم
    ﻻ تنقل الموضوع بدون ذكر المصدر مع رابط موقع وي كايرو


    واعلم اني سأتعقبك وانت تعلم نتيجة سرقة الحقوق وخطرها علي موقعك
    1. عاوز حد يعملى شغل فى المكروتيك بمقابل وده رقمى ٠١٢٠٠٠٨٨٩٦٤ عندى قفله فى المكروتيك

      ردحذف